Футболдан 2017-18 жылғы Чемпиондар лигасы өз мәресіне жетті. Киевте өткен турнирдің финалдық бәсеке «Реал Мадрид» пен «Ливерпуль» арасында өтіп, төрт гол соғылған ойында Мадрид командасының 3:1 есебіндегі жеңісімен аяқталды.
Матчтың бірінші таймы қақпаға гол соғылмай тең есеппен аяқталды. Ал екінші таймның 51-минутында Бензема «Ливерпуль» қақпашысының қателігін тиімді пайдаланып, ойындағы есепті ашты. Жанкүйерлер екінші голды көп күткен жоқ. Ағылшын командасы қақпасына өткізіп алған голдан 4 минуттан кейін есепті теңестіріп кетті. Гол авторы – Мане. Дегенмен 64 және 83-минуттарда Бейлдің соққан голдары «Реалға» Еуропа Чемпиондар лигасын қатарынан үш рет және жалпы 13-ші кубогын сыйлады.
Әли БИТӨРЕ,
«Егемен Қазақстан»